ਡਰ

ਕੁਝ ਬਦਲਦੀਆਂ ਸਰਕਾਰਾਂ ਨੇ,
ਕੁਝ ਵਕ਼ਤੀ ਕੰਮਾਂ ਕਾਰਾਂ ਨੇ,
ਕੁਝ ਦਫਤਰ ਦੇ ਸਰਦਾਰਾਂ ਨੇ,
ਸ਼ਾਇਦ ਫਿਰ ਕੱਲਿਆਂ ਕਰ ਦੇਣਾ ।

ਮੂੰਹੋ ਗੱਲ ਕੋਈ ਨਿਕਲੀ ਨੇ,
ਕੋਈ ਗਲਤੀ ਕੀਤੀ ਪਿਛਲੀ ਨੇ,
ਤੇ ਦੂਰੀ ਆਪਸ ਵਿਚਲੀ ਨੇ,
ਸ਼ਾਇਦ ਫਿਰ ਕੱਲਿਆਂ ਕਰ ਦੇਣਾ ।

ਕੁਝ ਇੱਕ ਦੂਜੇ ਤੋਂ ਡਰਦੇ ਨੇ,

ਕੁਝ ਨਾਸਮਝੀ ਜਿਹੀ ਕਰਦੇ ਨੇ,
ਕੁਝ ਆਪਸ ਵਿਚਲੇ ਪਰਦੇ ਨੇ,
ਸ਼ਾਇਦ ਫਿਰ ਕੱਲਿਆਂ ਕਰ ਦੇਣਾ ।

ਕੁਝ ਮਿਠੀਆਂ ਕੌੜੀਆਂ ਬਾਤਾਂ ਨੇ,
ਨਾ ਹੋ ਰਹੀਆਂ ਮੁਲਾਕਾਤਾਂ ਨੇ,
ਮੇਰੇ ਵਕ਼ਤੀ ਹਾਲਾਤਾਂ ਨੇ,
ਸ਼ਾਇਦ ਫਿਰ ਕੱਲਿਆਂ ਕਰ ਦੇਣਾ ।